Физички нападнати полицајци во затворите во Штип и Идризово
Затвореник од Кочани е обвинет за кривично дело поради заканување кон затворски полицајци во КПУ Штип, при што еден од нив бил физички повреден. На него му е поднесена кривична пријава поради инцидентот кој се случил во установата.
„СВР Штип поднесе кривична пријава против Ж.Ж.(43) од Кочани поради постоење основи на сомнение за сторено кривично дело „загрозување на сигурноста“. На 19.03.2025 во Казнено – поправната установа Затвор Штип, три службени лица од установата го затекнале пријавениот со мобилен телефон, кој по усната наредба да го предаде телефонот, упатувал закани кон тројцата, а на еден од нив со стаклен предмет му нанел повреда“, велат од МВР.
Двајца затвореници во затворот во „Идризово“ добија пријава бидејќи нападнале затворски полицајци.
„СВР Скопје поднесе кривична пријава против В.М.(39) и Т.С.(56), двајцата од Скопје, поради постоење основи на сомнение за сторено кривично дело „напад врз службено лице при вршење работи на безбедноста“. На 18.01.2025 во Казнено – поправната установа Затвор Идризово, пријавениот В.М. нападнал затворски полицаец додека извршувал службени дејствија. Додека, на 15.02.2025 во Затворот Идризово, пријавениот Т.С. нападнал вработен во установата, додека извршувал работни задачи“, велат од МВР.
