Фирма која произведувала долна облека ќе врши надзор на автопатите за 8.3 милиони евра
Фирма која произведувала долна облека ќе врши надзор на автопатите за 8.3 милиони евра.
Се работи за компанијата „Електра солушн“ на која главна дејност ѝ била производство на долна облека.
Истата компанија доби најголем дел од 22,3-милионскиот тендер за надзор на автопатите кои ќе ги гради „Бехтел и Енка“, објави „360 степени“.
Имено, од тендерот компанијата „Електра солушн“ добила вкупно 8,3 милиони евра, додека пак „Евро консалтинг“, на Бранислав Димитријевиќ, за кого има обвинение во Ерменија, доби 7,1 милиони евра од тендерот.
4,1 милиони евра одат кај „ИРД Инженеринг“ од Италија, додека услугите на локалната канцеларија на „ИРД“ во Скопје ќе чинат околу 2,4 милиони евра. За последниот партнер во конзорциумот, шпанско-кинеска „Ептиса“, се предвидени само 400.000 евра.
„Електра солушн“, до објавувањето на тендерот немала лиценца за надзор, додека пак барањето до Министерството за транспорт и врски фирмата го доставила 12 дена по објавување на тендерот, а лиценцата е издадена за помалку од 5 дена.
Според документите од Централниот регистар објавени од „360 степени“, компанијата постои вкупно 21 година, а во најголем дел за главна дејност имала производство на долна облека, но кратко давала услуги и во врска со информатичка технологија, пред да се вклучи во градежништво.
