ФИЛИПЧЕ СО ГОДИНИ МОЛЧЕЛ ДЕКА ПЕТРОВСКА НАБАВИЛА ЗА 37 МИЛИОНИ ЕВРА ПОСКАПИ ХЕЛИКОПТЕРИ Тој е против корупција само кога политички му одговара
Случајот со Славјанка Петровска, кој Венко Филипче го отвори во јавноста дури во моментот кога Петровска стана дел од Платформата „12.05“ и почна јавно да бара промени во СДСМ, е доказ за двојните стандарди на Филипче, соопшти ВМРО-ДПМНЕ.
„Платформата „12.05“ јавно побара Филипче да се повлече од лидерската позиција во СДСМ, а Филипче потоа директно ја прозва Петровска во врска со наводите околу набавката на хеликоптери и договор за кој, според Филипче, постоела разлика од дури 37 милиони евра. Ако Филипче со години располагал со информации за овој случај, тогаш зошто молчел досега? Зошто Филипче не ги доставил информациите до надлежните институции порано? И зошто токму сега, кога Петровска стана негов политички критичар, Филипче го обелоденува случајот“, прашува ВМРО-ДПМНЕ?
Преку овој случај на површина излезе целата хипокризија и двојните стандарди на СДСМ и на Филипче, додава партијата.
„Од една страна, Филипче постојано зборува за Европската Унија, европските вредности, владеењето на правото и борбата против корупцијата како услов за европскиот пат на Македонија. Од друга страна, кога станува збор за наводи за сериозни злоупотреби во сопствените редови во СДСМ, Филипче знаел и молчел сè до моментот додека тоа политички му одговарало“, се вели во соопштението на ВМРО-ДПМНЕ.
Европа не е само декларативна определба. Европските стандарди подразбираат одговорност, транспарентност и нулта толеранција кон корупцијата и кога сомнежите се однесуваат на сопствените редови, а не само кога можат политички да се искористат против противник, се додава во соопштението.
„Ако Филипче навистина располагал со информации за наводниот случај од 37 милиони евра, тогаш зошто досега молчел? Не може од една страна да се бараат европски стандарди и европско обвинителство, а од друга страна да се нема јасен одговор и да се молчи. Ако европскиот пат значи владеење на правото, тогаш истиот принцип мора да важи за сите, и за политичките противници, и за сопствените редови“, порачува ВМРО-ДПМНЕ.
.
Извор: plusinfo.mk
