Филипче: Парите од унгарскиот кредит се трошат за други намени
Венко Филипче, претседателот на СДСМ, на денешната прес-конференција рече дека има информација, според која Владата парите од т.н. Унгарскиот кредит од 250 милиони евра за кредитирање на бизнисот преку деловните банки ги троши за други намени.
Според Филипче, државната Развојна банка, која треба да им ги даде овие средства на домашните комерцијални банки, ги нема овие пари на располагање, и наместо тоа, се задолжува од Буџетот.
– Владата треба да го одговори тоа, а до нас пристигнуваат информации и од банките и од компаниите. Од банките велат дека не прифаќаат повеќе апликации за кредитирање затоа што им стигнуваат информации дека потоа Владата нема да може да им ги даде парите. Затоа и примаат сосема мала бројка на апликации.
За што се потрошени парите треба да одговори Владата. Знаеме дека е променет Законот за банки и Развојната банка сега има право да се задолжува од Буџетот. Е сега Владата нека каже дали е тоа вистина, рече Филипче.
