Филипче остро по падот на Орбан: ВМРО-ДПМНЕ го изгуби сојузникот, нема веќе криење за Груевски!
Лидерот на опозициската СДСМ, Венко Филипче, преку социјалните мрежи упати силна реакција по повод историскиот пораз на долгогодишниот унгарски премиер Виктор Орбан. Филипче го оцени овој настан како победа на демократијата и најави дека падот на автократските режими ќе има директно влијание врз политичката сцена во Македонија и регионот.
Во своето обраќање, Филипче истакна дека Унгарија вечерва кажала „ДОСТА Е“, потсетувајќи дека СДСМ со месеци наназад го најавувала ваквото сценарио. Тој директно го поврза поразот на Орбан со владејачката ВМРО-ДПМНЕ и статусот на поранешниот премиер Никола Груевски.
„Криминалната организација ВМРО останува без својот единствен сојузник во ЕУ. Нема повеќе криење на Груевски во Будимпешта, ниту бизнис комбинации“, дециден е Филипче.
Тој го поздрави и најавениот потег на новиот унгарски премиер, Петер Маѓар, за длабока реформа на медиумскиот сектор во Унгарија, кој долги години беше под силно влијание на Орбан.
Лидерот на СДСМ смета дека изборите во Унгарија се почеток на домино-ефект кој ќе ги зафати останатите, како што вели, автократски режими во регионот.
„Паѓаат автократските режими. Следен е Вучиќ, а со него и Мицкоски“, порача Филипче, најавувајќи враќање на опозицијата на власт.
На крајот од својата објава, Филипче испрати оптимистичка порака за европската иднина на државата, нагласувајќи дека „време е за демократија“ и дека СДСМ ќе ја врати моќта кај граѓаните, а со тоа и Македонија на нејзиниот европски пат.
