Филипче на Националниот совет за евроинтеграции: „Властa ја стопира европската перспектива на земјата“
Претседателот на СДСМ, Венко Филипче, денеска на Националниот совет за евроинтеграции изрази загриженост за застојот на земјата на патот кон Европската Унија, истакнувајќи дека актуелната власт практикува политики кои ја оддалечуваат Северна Македонија од европските вредности.
„Оваа власт не сака Европа – сака контрола, капитал и изолација“, рече Филипче, додавајќи дека од половина мандатот не се спроведуваат реформите и препораките од извештаите на ЕУ. Тој истакна дека нема политичка волја за спроведување на уставните измени, кои се клучни за отворање на преговарачките кластери, а реформската агенда е практично непостапена.
Филипче потенцираше дека отвореното проруско влијание, сомнителниот капитал од странство и контролата на медиумите од блиски на странски лидери дополнително го отежнуваат европскиот пат на земјата. „Намерно сме ставени на маргините на Европската Унија“, рече тој, додавајќи дека антиевропските практики се видливи и во ограничувањето на слободата на говорот и влошувањето на односите со соседите.
На крајот, Филипче предупреди дека воведувањето на новиот електронски систем за превозници ќе има сериозни економски последици, со што граѓаните повторно ќе го платат цената на лошите владини политики.
„Ја прашувам оваа власт дали навистина сака чекор напред кон Европската Унија, бидејќи досегашното однесување покажува дека тоа не е случај“, заклучи Филипче.
