ФИЛИПЧЕ НАЈАВИ ДЕКА УСТАВНИОТ СУД ЌЕ ГО ПОНИШТИ ЛИНЕАРНОТО ЗГОЛЕМУВАЊЕ Лидерот на СДСМ ги плаши пензионерите дека ќе немале пензии
За година и пол владата на Христијан Мицкоски направи хаос во Фондот за ПИОМ со што во ризик ја доведе исплатата на пензиите и се обидува со бесрамни лаги и манипулации да ја префрли вината за тој хаос, рече денеска претседателот на СДСМ, Венко Филипче на прес-конференција.
– Велат дека СДСМ сакал преку судството да ги намали пензиите на пензионерите. Ваква лага одамна не сме слушнале. И сакам јасно да им порачам на пензионерите, хаосот којшто се случува во пензискиот систем, нестабилноста на пензискиот фонд којашто ВМРО-ДПМНЕ ја создаде за само година и пол владеење, неизвесноста за тоа дали ќе има зголемување на пензиите во следниот период, како и неизвесноста дали воопшто ќе има исплата на редовни пензии следните месеци, сè е резултат на лошите политики, на лагите, на манипулациите на премиерот Мицкоски и владата на ВМРО-ДПМНЕ, ЗНАМ и Вреди – рече Филипче.
Филипче смета дека е потребно власта да се придржува до законското решение кое што беше донесено во времето на владата на СДСМ.
Тој најави дека Уставниот суд ќе го укине линеарното зголемување на пензиите.
– Законското решение на СДСМ беше логично, обезбедуваше доволна сума на пари за континуирано зголемување на пензиите, согласно зголемувањето на трошоците за живот, согласно растот на минималната плата, согласно инфлацијата. Ние направивме 50% усогласување со инфлацијата, 50% усогласување со платите. А сега Владата донесе несоодветно решение и ќе видиме сега, според одлуката на Уставниот суд, многу веројатно противуставно решение – рече Филипче.
Од партијата на Филипче неколку дена наназад тврдат дека во Фондот на пензиско и инвалидско осигурување немало пари, но оттаму ги демантираа овие тврдења. Од ПИОМ велат дека исплатата на пензиите ќе се одвива нормално.
.
