Филипче до Црвенковски: Или си СДСМ или не си!
Лидерот на СДСМ, Венко Филипче, денеска јавно се дистанцираше од поранешниот претседател на партијата, Бранко Црвенковски, по објавата на фотографии од ресторан во Охрид на кои Црвенковски е во друштво на политички противници.
„Можам само да го цитирам поранешниот претседател со неговата позната изјава ‘Или си СДСМ или не си’“, изјави Филипче на денешната прес-конференција.
На фотографиите, Црвенковски е виден во ресторан со градоначалникот од ВМРО-ДПМНЕ, Кирил Пецаков, и пратеникот Саше Донев од истата партија. На една од фотографиите на масата се присутни и газдата на фирмата „Пупе компани“. На друга фотографија, Црвенковски е со носителката на советничката листа на ЗНАМ за Охрид, Марина Горговска.
Според медиумските извештаи, ова не е прва средба на Црвенковски со Пецаков, а претходно наводно имало уште две средби во куќата на семејството на Црвенковски во Слатино, Охридско.
Медиумите шпекулираат дека на средбите Црвенковски наводно побарал и договорил Пецаков да заврши работа за негов пријател бизнисмен, а за возврат Црвенковски да му обезбеди поддршка за претстојните локални избори.
Фотографијата со Горговска била објавена од самата носителка на нејзиниот Фејсбук профил. Од почетокот се шпекулира дека зад формирањето на партијата ЗНАМ стои Црвенковски.
Бранко Црвенковски претходно јавно го замрзна членството во СДСМ, партија на чие чело долго време беше незадоволен и револтиран од политиката на тогашниот лидер и премиер Зоран Заев, особено во врска со односите со Бугарија и интервјуто на Заев за бугарски „Бгнес“.
