ФИЛИПЧЕ ДА НЕ ПАНИЧИ, ПРЕД СЛЕДНИТЕ ИЗБОРИ ЌЕ ИМА ТЕХНИЧКА ВЛАДА Мицкоски ги расчисти сите дилеми
Техничката влада останува и на следните избори, а се укинува за изборите после нив, па оттука стравот на опозицијата и на Венко Филипче кои се противат на овие измени е дека и следните избори ќе ги изгубат, рече премиерот Христијан Мицкоски.
– Измените во Законот за влада велат дека на следните парламентарни избори останува да важи техничката влада, а тоа подразбира дека, како што беше за изборите во 2024, на изборите во 2020, на изборите во 2016 година, така и на следните избори парламентарни останува техничката влада. Јас 100 дена пред одржување на изборите како политички претседател на Владата давам оставка, доаѓа технички премиер кој го бира Парламентот, опозициската СДСМ учествува со свои кадри во рамките на владините тела, министерства, заменици министри итн – рече премиерот Мицкоски во гостување на Сител.
Мора јавноста ова да го знае, додаде тој, ова е факт, дека на следните избори ние ќе имаме техничка влада.
– Бидејќи самиот претседател на СДСМ вели дека се тие толку силни, организирани, луѓето го препознаваат тоа, се приклучуваат кон СДСМ видни интелектуалци професори итн., претпоставувам дека на следните избори на коишто ќе има техничка влада тие ќе победат и ќе формираат политичка влада. Законот вели дека од тие избори потоа, нема да важи, а тоа значи дека тие коишто ќе ја предводат владата после победата на следните избори веќе ќе немаат техничка влада, ќе можат да си владеат со владата, ќе можат да ја управуваат државата итн. Тоа се законските измени, тоа е суштината. Ако СДСМ е толку силна и екипирана и очекува дека ќе победи на следните избори како што тврди Филипче, во тој случај на следните избори СДСМ би формирала влада, а ВМРО-ДПМНЕ би била опозиција – рече Мицкоски.
Не се разбирливи аргументите на СДСМ со кои се спротивставуваат на ова решение, потенцира тој.
– И сега ако ние веруваме дека сме зрела демократија и зрело демократско општество, ако ние веруваме дека навистина техничката влада си го одработила своето и застануваме позади овој концепт, притоа ризикувајќи дека вака како што вели Филипче, мобилизирана, екипирана СДСМ, секојдневно ѝ се приклучуваат интелектуалци, професори итн., победува на следните избори, тоа значи дека на тие избори после следните ние ќе бидеме опозиција, а тие ќе бидат влада. Така што јас навистина не можам овие аргументи, овие тези, би рекол, без никаква логика, да ги разберам – истакна Мицкоски.
На следните избори, повтори, без разлика дали тоа ќе бидат редовни или предвремени, овие измени овозможуваат да има техничка влада.
– Бидејќи се силни, без разлика на анкетите, еве велат дека имаат анкети и сме губеле 150.000, го кревале својот потенцијал, им се приклучувале луѓе, интелектуалци, професори, токму тука ја даде таа изјава, во ова студио, а тоа значи дека на следните избори тие ќе победат и потоа ќе можат нормално да си организираат некои идни парламентарни избори во коишто ние ќе бидеме опозиција. Ако се толку сигурни – рече премиерот Христијан Мицкоски.
.
