Ферстапен ја прослави 30. пол-позиција во кариерата!
За тоа му беше доволен само еден „стинт“ во третата квалификациска сесија вечерва, која, настрана од него изобилуваше со настани. Возачите на Мекларен, Ландо Норис и Оскар Пјастри завршија втор, односно четврти, но веднаш штом завршија квалификациите сфатија дека се казнети.
Нивните најдобри остварувања беа избришани затоа што ги надминале границите на патеката, на точки каде што тоа е казниво, па затоа беа уназадени до нивното претходно најдобро време, Пјастри падна на шестото, а Норис дури на десеттото место.
Од тоа профитираа пилотите на Мерцедес, па Џорџ Расел в недела ќе стартува од првата линија, веднаш до Ферстапен, а Луис Хамилтон ќе биде трет. Четврти е Фернандо Алонсо, а Шарл Леклер петти.
Квалификациите се возат во петок, затоа што утре ќе има спринт-трка од 19.30 часот, а пред неа квалификации од 15. Главната трка е в недела од 19 часот. Ферстапен во викендот влегува со точно 400 бода, а го следи тимскиот колега Серхио Перез со 223, па на шест трки до крајот Холанѓанецот има шанси да ја осигура титулата. За тоа ќе му биде потребно да заврши три бода пред Перез.
