ЕУ воведе нови санкции против Русија насочени кон индустријата за дијаманти
Европската унија денеска објави дека воведе нови санкции против Русија поради нејзините напади врз Украина, насочени кон индустријата за дијаманти, во која има повеќе од 140 поединци и организации.
Ова е 12-та рунда санкции на ЕУ против Москва од избувнувањето на војната во Украина, пред речиси две години, јавува АП.
Од Брисел рекоа дека новите мерки ќе нанесат уште еден удар врз способноста на рускиот претседател Владимир Путин да води војна, бидејќи тие се насочени кон сектор од економијата што генерира многу приходи и го отежнува избегнувањето на санкциите на ЕУ.
Од 1 јануари ќе биде забранет увозот, купувањето и преносот на руски природни и индустриски дијаманти и дијамантски накит.
Забраната се однесува на дијаманти со потекло од Русија, извезени или транспортирани од таа земја, како и руски дијаманти преработени во други земји.
Новите санкции им забрануваат на компаниите од ЕУ да извезуваат „чувствителни стоки и технологија“ кои Москва би можела да ги користи во војната против Украина, како што се одредени хемикалии, литиумски батерии, термостати, електрични мотори и алати кои би можеле да се користат во производството на дронови.
