ЕУ со привремени санкции за Косово
Европската унија ќе воведе привремени санкции за Косово, потврди претставникот на Европската комисија Јан Герт Копман утрово во Брисел на седницата на Комитетот за надворешна политика на Европскиот парламент (АФЕТ).
Ќе биде предложен список со санкции до властите во Приштина поради непочитување на барањето за деескалација на северот на Косово.
„Санкциите вклучуваат стопирање на работата на телата во рамките на Договорот за стабилизација и асоцијација, ќе го прекинеме финансиското планирање за Косово и инвестициските предлози за Западен Балкан“, рече тој
За Косово ќе биде прекината поддршката преку процесот на јавни набавки и потпишувањето на нови договори, како и посети на високо ниво.
„Косовските власти не одговорија на барањата на претставниците на ЕУ за понатамошни чекори и затоа ЕК ќе воведе привремени санкции“, рече Копман.
Како што додаде, има малку знаци дека ќе дојде до деескалација на приштинската страна.
