ЕУ ПОВТОРНО СО ОПОМЕНА ДО ВУЧИЌ: Додека трае војната во Украина не може односите со Русија да бидат нормални
Европската Унија(ЕУ) го предупреди српскиот претседател Александар Вучиќ за последиците ако замине во Москва.
За најавата на Вучиќ дека на 9 мај ќе биде во Москва за да го прослави Денот на победата над фашизмот, портпаролот на ЕК Маркус Ламерт вели дека ЕУ сака да смета на Србија и дека државата треба да ја потврди својата стратешка насока кон ЕУ.
Тој додаде дека не сака да шпекулира за можните последици. Но, нагласи дека додека трае војната во Украина, односите со Русија не можат да бидат нормални.
„Србија аплицираше за членство во ЕУ. ЕУ сака да смета на Србија како на сигурен европски партнер кога станува збор за заеднички принципи, вредности, безбедност и напредок. Потребно е Србија да ја потврди својата стратешка насока. Ние им бевме кристално јасни на сите наши партнери, вклучително и на земјите-кандидатки, вклучително и на Србија: односите со Русија не можат да бидат нормални, додека режимот на Путин е на власт и во сенка на неиспровоцирана и неоправдана руска војна и агресија против Украина“, изјави портпаролот.
Вучиќ на 23 април, нагласи дека „не го променил својот став и покрај притисокот“ и најави дека ќе оди во Москва на 9 мај на парадата по повод 80-годишнината од победата над фашизмот во Втората светска војна. И украинските власти повикаа лидерите да не одат во Русија на тој ден. Руската инвазија трае повеќе од 3 години.
Фото EPA-EFE/ANDREJ CUKIC
