ЕУ ОДОБРИ НОВА ТРАНША ОД ПЛАНОТ ЗА РАСТ: За Македонија 16 милиони евра, но исполнети само 4 од 9 пријавени реформи
Европската Унија ја одобри втората транша средства за Северна Македонија од Инструментот за реформи и раст за Западен Балкан, со што се ослободува вкупен нето износ од 16 милиони евра. Одлуката, која е признание за дел од спроведените реформи, сепак доаѓа по оценката на Европската комисија дека земјата задоволително исполнила само четири од деветте чекори што ги пријавила како реализирани до јуни 2025 година.
Од одобрената сума, 7,4 милиони евра ќе бидат исплатени директно во државниот буџет, додека остатокот е наменет за финансирање на инфраструктурни проекти преку Инвестициската рамка за Западен Балкан (WBIF). Вкупниот износ е утврден по одземањето на авансно исплатените средства.
Позитивната оценка на Комисијата се базира на исполнувањето на четири клучни реформски чекори. Три од нив се во областа на дигитализацијата и се однесуваат на усвојувањето на новиот закон за сајбер-безбедност (усогласен со европската NIS2 Директива), законот за електронски документи со кој се воведува европскиот дигитален идентитет и законот за архивски материјал кој овозможува електронско архивирање. Четвртиот исполнет чекор е во делот на деловната средина, каде Комисијата потврдила значителен напредок во борбата против неформалната економија преку зголемен број инспекции.
Одлуката следува по барањето поднесено од министерот за европски прашања, Орхан Муртезани, и потврдата дека земјата ги исполнува општите услови за демократско владеење, владеење на правото и управување со јавните финансии. За реформските чекори кои Северна Македонија ги пријавила како исполнети, но кои не ја поминале техничката проценка на Комисијата, одобрен е продолжен рок за нивна целосна имплементација до јуни 2026 година.
