ЕУ гласаше за шестмесечно продолжување на санкциите против Русија
Шефицата на европската дипломатија, Каја Калас, официјално потврди дека Европската унија гласала за уште едно шестмесечно продолжување на економските санкции против Русија.
– Министрите за надворешни работи на Европската унија штотуку се договорија уште еднаш да ги продолжат санкциите против Русија – напиша Калас на мрежата Икс.
Сијарто: Унгарија доби гаранции
Унгарија доби гаранции за енергетска безбедност од Европската комисија, кои ги побара пред гласањето за продолжување на санкциите против Русија, соопшти министерот за надворешни работи и економски односи на Унгарија, Петер Сијарто, кој учествува на состанокот на министрите за надворешни работи на ЕУ во Брисел.
-Унгарија ги доби гаранциите за енергетска безбедност што ги бараше. Европската комисија е посветена на заштитата на гасоводите и нафтоводите кои одат во земјите-членки на ЕУ. Таа јасно стави до знаење дека интегритетот на енергетската инфраструктура што ги снабдува земјите-членки на ЕУ е безбедносно прашање за целата Европска унија – напиша Сијарто на социјалните мрежи.
Тој посочи дека Европската комисија побарала и гаранции од Украина за зачувување на испораките на нафта во Европската унија.
Претходно, пред можното продолжување на санкциите против Русија, Сијарто побара гаранции од шефицата на европската дипломатија Каја Калас и од генералниот секретар на Организацијата за економска соработка и развој Матијас Корман дека Украина и ЕУ нема да се мешаат во снабдување со енергија на Унгарија.
