ЕУ е чекор поблиску до воведување на Истанбулската конвенција
Советот на ЕУ го одобри пристапувањето на Унијата кон Конвенцијата на Советот на Европа за спречување и борба против насилството врз жените и семејното насилство (Истанбулска конвенција).
„Насилството врз жените е неприфатливо и мора да престане. Ваквите дела немаат место во нашите општества. Истанбулската конвенција е водич и катализатор за акција. Денешната одлука за пристапување во ЕУ ја покажува нашата посветеност за зајакнување на акцијата против родово базираното насилство и во поддршка на неговите жртви“, рече Паулина Брандберг, шведска министерка за родова еднаквост и заменик министер за вработување.
Конвенцијата создава правна рамка за заштита на жените од насилство. Опфаќа широк опсег на мерки, од собирање податоци и подигање на свеста до законски мерки за криминализирање на различни форми на насилство врз жените. Вклучени се и мерки за заштита на жртвите и за обезбедување услуги за поддршка.
Пристапувањето на ЕУ кон Конвенцијата е поттик во напорите на ЕУ да постигне еднаквост меѓу жените и мажите. Насилството врз жените не е само кривично дело, туку и екстремна форма на дискриминација вкоренета во родовата нееднаквост, забележува Советот на ЕУ, додавајќи дека насилството врз жените придонесува за одржување и зајакнување на овие нееднаквости.
Конвенцијата на Советот на Европа за спречување и борба против насилството врз жените и семејното насилство е првиот меѓународен инструмент чија цел е да се елиминира насилството врз жените, вклучително и девојчињата помлади од 18 години.
Насилството врз жените и девојчињата е едно од најсистемските и најчестите прекршувања на човековите права во светот. Секоја трета жена била жртва на физичко или сексуално насилство, најмногу од интимни партнери.
Истанбулската конвенција стапи на сила во април 2014 година и беше потпишана од ЕУ на 13 јуни 2017 година.
Советот и Европскиот парламент се во процес на усвојување на закон на ЕУ за борба против насилството врз жените и семејното насилство. Голем број на злосторства треба да бидат криминализирани низ ЕУ, како што се споделување интимни слики без согласност, осакатување на женски гениталии и сајбер-малтретирање.
Шест години откако ЕУ ја потпиша Конвенцијата, таа сè уште не е ратификувана поради одбивањето на неколку земји-членки. Сепак, мислењето на Судот на правдата на ЕУ од 6 октомври 2021 година вели дека Европската унија може да ја ратификува Истанбулската конвенција без согласност на сите земји-членки . Пристапувањето на ЕУ кон Истанбулската конвенција не ги ослободува земјите-членки од нејзината национална ратификација, потсетија европратениците во февруари и ги повикаа преостанатите шест земји – Бугарија , Чешка, Унгарија, Латвија, Литванија и Словачка – да ја ратификуваат Конвенцијата. веднаш.
