ЕУ бара од Google и Facebook да ја означат содржината произведена од вештачка интелигенција
ЕУ побара од компаниите за социјални медиуми, вклучувајќи ги Гугл и Фејсбук, „веднаш“ да започнат со означување на содржината произведена од вештачката интелигенција (ВИ).
Во исто време, Брисел го предупреди Твитер дека ќе се соочи со санкции доколку не ги почитува новите закони за дигитални содржини кои стапуваат на сила на 25 август ширум ЕУ, пишува Гардијан.
ЕУ дополнително побара од Facebook и другите платформи да инвестираат повеќе во проверка на точноста на информациите на јазиците на малцинствата и во Источна Европа, бидејќи Брисел смета дека „руските кампањи за дезинформација“ се закана.
„Ова не е само работа. Русија сака да ја поткопа поддршката на јавното мислење на граѓаните на ЕУ за помош на Украина“, рече заменик-претседателката на Европската комисија, Вера Јурова.
Таа го критикуваше Твитер што пред две недели одлучи да не се придржува до таканаречениот кодекс на однесување на ЕУ што го договорија 44 технолошки компании, вклучително и Јутјуб и ТикТок.
Денеска Јурова ја окарактеризира одлуката на Твитер како „грешка“ и рече дека оваа компанија „избрала конфронтација“.
