„Ќерка ми ја уби несоодветната терапија, а не канцерот“: Потресно сведочење на мајка на почината пациентка
Во Основниот кривичен суд во Скопје денеска продолжи судењето против поранешниот директор на Клиниката за радиотерапија и онкологија, Нино Васев, и двајца онколози, обвинети за несовесно лекување на пациенти.
На клупата за сведоци застана Јулија Мациевска, мајката на починатата Адријана Начевска, која пред судот раскажа низ што поминала нејзината ќерка за време на лекувањето. Таа изјави дека уште од почетокот на имунотерапиите состојбата на Адријана се влошувала, иако претходно успеала да ги преброди хемотерапиите.
„На мојата ќерка никогаш не ѝ беше измерена телесната тежина. Алармирав за нејзината состојба, но добивав одговор дека тоа е нормално и ќе помине. Со секоја нова имунотерапија, симптомите беа сè поизразени“, сведочеше Мациевска, додавајќи дека довербата кон Васев и неговите колеги на почетокот била голема, но со текот на времето ја изгубиле.
Таа пред судот изјави дека ќерката не починала од рак, туку дека, како што рече, „ја убиле со хемии“.
Адвокатот на Васев, Никола Ставрев, пак, изјави дека сведочењата се наведени од Обвинителството и дека медицинските докази се проблематични. „Станува збор за вештачење направено во Словенија од лице кое не е квалификувано за ваква постапка“, рече Ставрев.
Дел од обвинетите и понатаму ја негираат вината. Васев и онколозите Симонида Црвенкова и Драган Јакимовски на претходното рочиште изјавија дека се работи за „заговор“ и најавија дека ќе ги оспорат сите докази на Обвинителството.
Судскиот процес, кој го води судијката Снежана Марковска, се однесува на обвинувања за несовесно лекување и примена на неподобни терапии кај 29 пациенти, со отстапувања во дозирањето и без соодветна проценка на нивната здравствена состојба.
