Со вино брендирано со амблем на АНБ и тајни информации – пратениците по надзорот си заминаа од задната врата со комбе и без споделување детали за злоупотреби!
Пратениците од собраниската комисија за надзор во безбедносните служби денеска беа во посета на Агенцијата за национална безбедност (АНБ). Како што јавува Телма, тие влегле преку предната порта на МВР, но си заминале низ службената капија од задната страна, без телефони и без одговори за медиумите.
Опозициската пратеничка Славјанка Петровска рече дека подготвила над 30 прашања, меѓу кои и околу полиграфските тестирања и смената на шефот на внатрешна контрола. Љупчо Пренџов од ВМРО-ДПМНЕ истакна дека службите мора да бидат „чувари на државата, а не генератор на кризи“.
Посетата ја одбележа и фактот што пратениците добија вино со амблем на АНБ како сувенир. Дел од опозицијата пак предупреди дека надзорот е речиси невозможен, бидејќи повеќе од шест месеци чекаат безбедносни сертификати кои според закон треба да ги добијат во тој рок.
Наредниот ден е најавена и посета на Агенцијата за разузнавање.
