EOS Матрих Македонија ја завршува 2025 година со рекордни деловни резултати и инвестиции од над 30 милиони евра
Со рекордни деловни резултати, значајно зголемени инвестиции и јасна стратегиска насока за идниот период, EOS Матрих Македонија ја заокружува 2025 година како најуспешна во своето работење. Во услови на зголемена динамика на секундарниот пазар на нефункционални пласмани и засилени регулаторни барања, компанијата дополнително ја зацврсти својата лидерска позиција, како еден од клучните чинители во управувањето со побарувањата и поддршката на финансиската стабилност во земјава.
Во годината што изминува, EOS Матрих Македонија управуваше со портфолио од околу 150.000 предмети, од кои повеќе од 20 отсто се веќе затворени, со целосно намирени обврски кон компанијата. Истовремено, беа реализирани инвестиции од 15 милиони евра, што е повеќе од двојно зголемување во однос на претходната година. Со тоа, вкупните инвестиции на компанијата надминаа 30 милиони евра на македонскиот пазар, што ја потврдува нејзината долгорочна определба за поддршка на процесите на раздолжување кај граѓаните, на финансискиот сектор, како и на економскиот развој на земјата воопшто.
Особено значајно достигнување за 2025 година е преземањето на двете најголеми портфолија на нефункционални пласмани што досега се понудени на македонскиот пазар, од кои едното обезбедено, а другото е необезбедено.
„Резултатите што ги остваривме во 2025 година се јасна потврда на нашата долгорочна стратегија и на системскиот пристап во управувањето со побарувањата. Преку зголемени инвестиции, преземање на комплексни портфолија, користење на напредни технологии и интензивна дигитална трансформација, успеавме да изградиме стабилна платформа за одржлив раст. Во периодот што следува, наш фокус останува да биде усогласување со европската регулатива, натамошно унапредување на дигиталните алатки, како и креирање на додадена вредност за финансискиот сектор и за економијата на земјава во целина“, изјави д-р Катерина Бошевска, главен извршен директор на EOS Матрих за Македонија и Косово.
Како дел од меѓународната EOS Групација, присутна на повеќе од 25 пазари во Европа, EOS Матрих во земјава делува според унифицирани европски стандарди и процеси. Во насока на унапредување на транспарентноста, ефикасноста и комуникацијата со корисниците, во фокусот на 2025 година беше континуираниот развој на MyEOS дигиталната платформа. Преку оваа алатка корисниците имаат можност да проверат дали се дел од портфолиото на EOS Матрих, да добијат целосен онлајн увид во својата индивидуална состојба, да вршат онлајн плаќања, како и да остварат директна комуникација со компанијата. Платформата нуди транспарентен, сигурен и флексибилен пристап кон управувањето со обврските, прилагоден на реалната финансиска состојба на корисниците, а тимот на ЕОС дава континуирана поддршка низ целиот процес.
Технолошката инфраструктура што ја користи EOS Матрих е идентична со онаа што се применува на развиените европски пазари, како што се Германија, Шпанија и Франција. Дел од развојот и унапредувањето на овие системи се реализира и во Македонија, преку EOS ITech – ИТ-хаб на групацијата, кој вработува домашни инженери што работат на решенија за европските пазари.
Во наредниот период, како еден од клучните предизвици за целиот сектор останува имплементацијата на европската регулатива за секундарниот пазар на нефункционални пласмани, која има за цел да обезбеди поголема стандардизација, повисок квалитет на услугите и фер третман на крајните корисници. Во тој контекст, за 2026 година фокусот на EOS Матрих ќе биде насочен кон натамошна дигитализација на процесите, континуирани инвестиции во портфолија, дополнително унапредување на платформата MyEOS, развој на решенија базирани на вештачка интелигенција и целосно усогласување со европските оперативни стандарди. Компанијата ќе остане посветена на својата мисија за обезбедување фер, транспарентни и ефикасни решенија кај граѓаните, компаниите и македонската економија во целина.
