Полицијата: Пронајден мртов осомничениот за убиството на осум лица во близина на Чикаго
Осомничениот за убиството на осум лица во предградие на Чикаго се самоуби кога беше опколен од полицијата во американската сојузна држава Тексас, соопшти полицијата.
Полицијата во Џолиет, во близина на Чикаго во сојузната држава Илиноис, на Фејсбук објави дека околу 20.30 часот по локално време го лоцирала и набрзо го опколила 23-годишниот Ромео Нанс во близина на Наталија во државата Тексас и дека извршил самоубиство.
Полицијата трагаше по него откако во неделата и понеделникот беа пронајдени осум тела застрелани на три различни локации во предградието на Чикаго.
Канцеларијата на шерифот во округот Медина, Тексас, на Фејсбук напиша дека добиле повик дека осомничениот за убиствата кај Чикаго се упатил кон Тексас на автопатот. Повеќе полицајци се упатиле кон бензинска пумпа и ја опколиле, каде што Нанс извршила самоубиство, соопшти канцеларијата на шерифот.
Полицијата во округот Вил и Џолиет, Илиноис, претходно соопшти дека не го знае мотивот за убиствата, но дека Ненс ги знаел неговите жртви. Федералното биро за истраги (ФБИ) и помагаше на локалната полиција во потрагата по осомничениот, изјави началникот на полицијата на Џолиет, Вилијам Еванс.
Жртвите биле пронајдени во неделата и понеделникот на три различни адреси, соопштија властите на прес-конференција претходно синоќа.
Едно убиено лице е пронајдено во неделата во куќа во округот Вил, Илиноис, а седум лица се пронајдени во понеделникот во две куќи на истиот блок во Џолиет, кој е на десетина километри северозападно од местото на настанот што полицијата прво го открила.
Полицијата, исто така, верува дека Ненс е поврзан со пукањето во Џолиет каде што еден маж беше ранет во неделата.
Полицијата се уште нема информации колку време биле мртви луѓето во куќите, а ги чека резултатите од обдукцијата.
