Кои се заложниците кои Хамас ги ослободи при првата размена со Израел?
Првата група израелски заложници беше ослободена денеска како дел од четиридневниот хуманитарен договор за прекин на огнот меѓу Израел и Хамас. Според катарските власти, меѓу ослободените има 13 Израелци, 10 тајландски државјани и еден Филипинец.
Кабинетот на израелскиот премиер ги објави имињата на ослободените заложници, наведувајќи дека „израелската влада се залага за враќање на сите киднапирани и исчезнати лица“.
Нашите граѓани го поминаа првиот лекарски преглед, а нивните семејства се известени дека се вратиле“, стои во соопштението за медиумите, пишува Би-би-си.
Како што јавува Би-Би-Си, меѓу ослободените има и неколку жени во седумдесеттите години. Едната е 77-годишната Маргалит Мозес, која Хамас ја киднапираше од Кибуц Нир Оз, а другата е 72-годишната Адина Моше. Таа беше однесена во Газа на 7 октомври од нејзиниот дом, исто така, во Кибуц Нир Оз, откако Хамас го уби нејзиниот сопруг Саид Моше.
Ослободена е и 79-годишната Чана Пери. Нејзината ќерка претходно изјавила дека Чана и нејзиниот син Надав биле киднапирани од нивниот дом во Кибуц Нир Оз. Надав се уште е во заробеништво на Хамас. Вториот син на Чана, 54-годишниот Рои, беше убиен на 7 октомври.
Даниеле Алони и нејзината шестгодишна ќерка Емилија исто така беа ослободени како дел од договорот меѓу Израел и Хамас.
Тие беа киднапирани на 7 октомври за време на посетата со нивното семејство во Кибуц Нир Оз.
За време на нападот, 45-годишната Даниеле во својата последна порака до семејството рекла дека „во нивната куќа има терористи“ и дека се плаши дека нема да преживее.
На списокот на израелски државјани објавени од кабинетот на израелскиот премиер се Дорон Кац Ашер (34 години), Раз Ашер (четири години) и Авив Ашер (две години), Рут Мундер (78 години), Керен Мундер (54). години) и Охад Мундер (девет години), Хана Кацир (76 години), Јафа Адар (85 години).
