Бајден гради ѕид на границата со Мексико

Администрацијата на Џо Бајден ќе изгради ѕид долж границата со Мексико. Целта – да се запре протокот на илегални имигранти. Во округот Стар, Тексас, ќе се гради бариера со должина од нешто повеќе од 30 километри.

Ѕид долж границата со Мексико беше едно од најпознатите ветувања на Доналд Трамп. Републиканецот сакаше да се огради целата граница долга повеќе од 3.000 километри. Џо Бајден секогаш ја критикувал оваа идеја. Кога се кандидираше за функцијата, вети дека ако е претседател нема да се изгради ниту еден метар од ѕидот. Тоа ги натера новинарите од Белата куќа да го прашаат претседателот зошто се гради нов ѕид. Тој одговори дека парите биле издвоени во 2019 година од администрацијата на Трамп.

„За ѕидот ќе дадам само еден одговор – парите се обезбедени. Се обидов да им ја сменам целта, тие одбија. Законски не можеме да ги трошиме за ништо друго освен за она за што се изгласани. Не можам да ја запрам оваа градба“, објасни Бајден.