Ќе се слика ли Африм Гаши? Собранието му купи нов фотоапарат за кој потроши 5.660 евра народни пари!
Фотоапаратот марка Никон модел Z8 чини 3.780 евра, а објективот за фотоапаратот е Никон Никкор Z 27-70mm чини 1.880 евра. Вкупно за фотоапарат и објектив кабинетот на Африм Гаши, собранискиот спикер потроши 5.660 евра. За тие пари просечен Македонец работи 8 месеци. Во септември годинава од Кабинетот на Гаши за „Фактор“ потврдија дека фотоапаратот е наменет за фотографирање на претседателот на Собранието
Собранието, по три месеци, одлучи да склучи договор за купување фотоапарат и објектив за што плати 5.660 евра народни пари. Договорот за купување на фотоапарат и објектив е склучен кој крајот на ноември иако тендерската постапка заврши во септември.
Уште во септември овој тендер на Собрание го привлече вниманието на јавноста затоа што како барател на набавката беше адресиран Кабинетот на Африм Гаши, собранискиот претседател. Во таа набавка освен фотоапарат и објектив беше вклучена и набавка на 30 ЛЦД телевизори и на 12 инвертер клими.
Во реакцијата од Кабинетот на Гаши на прашањето на „Фактор“ беше одговорено дека набавката на телевизорите е за потребите на Собранието, додека за потребите на Кабинетот на претседателот на Собранието е фотоапаратот.
Договорот за набавка е склучен со штипската компанија „Интер-фото“, а потписник во име на Собранието е генералната секретарка Марина Димовска. Во договорот меѓу другото пишува дека испораката на фотоапаратот и на објективот ќе се реализира во рок до 30 дена од денот на потпишување на договорот. Исто така пишува и дека фотоапаратот и објективот имаат 24 месеци гаранција.
Сите детали од договорот се достапни на следниот линк https://e-nabavki.gov.mk/PublicAccess/home.aspx#/dossie-acpp/47a6102c-8a1d-4618-b2f2-c26cce8fc2c2
Наведено е дека добиле 5 понуди за фотоапарат и објектив и дека договорот е доставен до Бирото за јавни набавки на 26 ноември иако тендерот заврши во септември.
Повеќе детали за тендерот со назив „Телевизори, уреди за ладење и/или греење и фотографска опрема за потребите на Кабинетот на претседателот“ на следниот линк https://faktor.mk/ushte-eden-nesmasen-gaf-na-lugjeto-na-gashi-zoshto-pretsedatelot-na-sobranie-sluzbeno-kupuva-30-lcd-televizori-i-12-invereter-klima-uredi
Р.Ф.
