ЌЕ СЕ ПРОДАДЕ ЛИ ВРЕДЕН ИМОТ И РУДА НА ФЕНИ ЗА ЕВТИНИ ПАРИ – стечајот тече, понудите се ниски, како ќе „пресечат“ доверителите

Се продава голем и вреден имот на поранешен ФЕНИ, сегашен Еуроникел во стечај, и тоа за евтини пари. Се продаваат и објекти и суровини, а преку Централниот регистер уредно можат да се видат и цените кои ги нудат потенцијалните купувачи, а кои се значително пониски од проценетата вредност.

Оваа продажба на делови од имотот на кавадаречкиот комбинат во стечај делува малку збунувачки, бидејќи, како што е познато, имотот на Еуроникел го купи реномираната и моќна турска компанија Јилдирим, која, барем според најавите и очекувањата, требаше да донесе сериозна додадена вредност и стабилност на оваа компанија за производство на никел.

Како што е објавено, на 21 октомври треба да се одржи Собрание на доверителите на трговското друштво за ископ на руди, производство на метали, трговија и услуги, Еуроникел Индустри ДОО од село Возарци, Кавадарци, на кое тие треба да гласаат за продажба на броен имот за кој веќе се доставени и понуди од потенцијални заинтересирани страни.

Собранието на доверители на стечајниот должник Еуроникел го свикува Основниот суд во Кавадарци, преку стечајната судијка Елизабета Петковска, а доверителите всушност треба да гласаат за носење на одлука за продажба на имотот, односно стечајната маса на должникот, и тоа за многу значаен и прецизно назначен имот.

Првиот пакет што се продава е инвентар и лабораторија, а нивната вкупна проценета вредност е 230 илјади евра. За овој имот има понуда некој да го купи за 135 илјади евра, што е нешто повеќе од половина од вредноста, или прецизно 58,72 отсто од проценетата вредност.

Потоа, во пакетот број 2 влегува капекс магацин со проценета вредност од над 707 илјади евра, но за неа стечајниот управник на комбинатот добил понуда од само 220 илјади евра, што е само нецела една третина или 31,11 проценти од проценетата вредност на овој објект.

Пакетот број 3, пак, е насловен како Нова Инженеринг магацин, со проценета вредност од 440 илјади евра, а за него има понуда да се продаде за сума од 20 илјади евра, што е само 4,54 проценти од проценетата вредност.

Во четвртиот пакет е наведено дека се продава ОПЕКА, што во превод би значело цигли, чија проценета вредност е близу 1,1 милиони евра, а за овие материјали понудата е 257 илјади евра, што е само 23,78 отсто од проценетата вредност.

Петтиот макет се состои од магацин резервни делови со проценета вредност од над 6 милиони евра, а за овој магацин е добиена понуда од само 1,23 милиони евра, што е рамно на 20,34 отсто од проценетата вредност.

Во шестит пакет влегува разна руда, од Брегот на слоновата коска, Албанија и Гватемала, со проценета вредност од 269 илјади евра, а за него е добиена понуда од 184 илјадин евра, што изнесува 68,42 проценти од проценетата вредност.

Осмиот пакет, пак, се состои од цврсти горива, и тоа лигнит од Индонезија, лигнит од Колубара и камен јаглен од Русија, со проценета вредност од 187 илјади евра, а за нив е добиена понуда од 129 илјади, што е процент од 68,78 отсто.

За неколку пакети воопшто не е добиена понуда.

Ќе се разгледува и исходот од електронска е-аукција одржана на 30 септември.

Исто така, како точка на дневен ред е ставено и гласање по предлог за купување на 250 акции од МКК Еуроникел 2005 АД Кавадарци, поднесен од општина Кавадарци до судот на 27 септември. 

Инаку, со одлука од пред неколку дена се основал Одборот на доверители на Еуроникел по предлог на стечајниот управник Младен Веселинов. За членови на Одборот на доберители се именувани друштвото за производство, промет, трговија и консалтинг Ролис ГМ ДООЕЛ од Кавадарци, потоа општина Кавадарци, потоа државата односно Владата, претставена преку Министерството за финансии и Управата за јавни приходи и тоа регионалната дирекција Прилеп. Првата седница на Одборот на доверители ќе се одржи на 4 октомври во Основниот суд Кавадарци. Сите овие треба да именуваат свои претставници во одборот на доверители.

Н.Н.Ф.