Ќе плаќаме 25 милиони евра за активирани гаранции против ЈПДП и Железници – Транспорт
Министерот за финансии, Фатмир Бесими, денеска при претставувањето на ребалансот на државниот буџет, објави дека на расходната страна се префрлени дополнителни 25 милиони евра поради активирани гаранции за нереализирани услови од финансиски договори што ги склучувале јавното претпријатие „Државни патишта“ и акционерското друштво Железници на РСМ Транспорт.
Според она што го кажа министерот, едната гаранција против ЈПДП ја активира кинеската ЕКСИМ-банка која ја финансира изградбата на автопатот Кичево – Охрид, како и други проекти во земјата, додека за Железници Транспорт од подамна се знае дека е заглавено во големи долгови кон надворешни компании и дека Владата формираше работни групи за тоа. Бесими не наведе колку ќе се плаќа за поединечните случаи, ниту пак изнесе дополнителни детали.
– Во буџетот се обезбедени средства за неопходните потреби. 25 милиони евра се обезбедуваат за паднати гаранции во однос на ЕКСИМ-банката што е за јавното претпријатие Државни патишта, како и за МЖ Железници, рече Бесими.
Ова се потреби кои не можеле да се планираат во текот на годината, додаде тој, па така за судски одлуки и решенија против државата се одредени дополнителни 300 милиони денари.
