Ќе ја интензивира ли Јавното обвинителство предистражната постапка за предметот според кој Телеком треба да плати 4 милиони отштета на човек фирма?

Јавното обвинителство работи на предистражната постапка за предметот во кој
е донесена одлука Телеком да плати отштета од 4 милиони евра на човек фирма од
Штип.

Се очекува во обвинителството да се забрза работата, особено откако Владата упати
остри критики за отсуството на резултати од работата на обвинителството, по што
следеа интерни контроли. Постапката во Обвинителството почна откако
вицепремиерот и министер за транспорт и врски Александар Николоски, пред
неколку месеци го испрати предметот за натамошно разгледување.

Се работи за предметот во кој Апелација, преиначувајќи ја првостепената
одлука, пресуди Телеком да плати 4 милиони евра отштета на човек фирма од Штип. Фирмата
имала склучено договор со Телеком во периодот од 2001 до 2002 година.
Договорот бил раскинат од Телеком поради
неплаќање на обврските од страна на фирмата. Потоа почнал долг судски спор
пред првостепениот Граѓански суд во Скопје, кој минатата година пресудил во
корист на Телеком, бидејќи судот утврдил дека се работи за фирма со еден
вработен, која повеќе години била со блокирана сметка, а е повторно активирана
непосредно по донесување на пресудата на Апелациониот суд. Фирмата не дала ниту
доказ за број на претплатници, инвестиции и слично.

Во Телеком државата има удел од 35 отсто, па ваквата судска пресуда ќе значи и
помал принос во државната каса по основ на дивиденда. Детални информации за
случајот се испратени и во Владата и во Министерството за транспорт и врски,
Министерството за правда, Министерството за дигитална трансформација и до
Генералниот секретаријат на Владата. Во информацијата се споделени низа докази
за повреди на Законот за судови и Законот за парнична постапка, но и сериозни
индиции за недозволени влијанија помеѓу судии и адвокати на човек фирмата на
која и беше досудено да наплати отштета
од 4 милиони евра. Покрај тоа, констатирано е дека во преиначената пресуда од
Апелација се споменуваат документи на Телеком кои воопшто не биле дел од
постапката, а дел од правниот тим на штипската фирма е и лице кое до 2015
година работело во Телеком во секторот за правни работи.

За истиот предмет по претставка за судијката
известител расправаше и Републичкиот судски совет, по што беше усвоен извештај
во кој беа констатирани низа
незаконитости во постапката, меѓу кои и дека бил потпишан записник и пресуда
без да се видат списите за предметот, како и дека пресудата со која се
преиначува првостепената одлука била донесена без одржување на јавна расправа,
што е спротивно на Законот за парнична постапка. Републичкиот судски совет се
очекува да закаже нова седница на која ќе се разгледува одговорноста на
судиите. За истиот предмет постојат повеќе претставки до РСС, кои според
најавите ќе бидат споени, а една од нив е поднесена од претседателката на
Апелациониот суд Мери Дика Георгиевска.