Две фирми поврзани со Заеви први одбиени да произведуваат електрична енергија

Две фирми од Струмица за производство на електрична енергија во сопственост, односно блиски до семејството Заеви, на крајот на мај се одбиени во нивните барања до Регулаторната комисија за енергетика да започнат со работа, иако претходно ги поминаа сите геодетски филтри кај општините и Министерството за транспорт.

Барањата со комплетираната документација за големите фотоцентрали биле поднесени лани, во меѓувреме биле подигнати високи кредити и поставувана била опремата, но на крај Соар Енерџи Груп и Ековат – Груп се единствените две друштва за производство на електрична енергија за кои што со посебни акти им се одбиени барањата за доделување на привремена лиценца.

Соар Енерџи Груп имал намера од три фотоцентрали со висока вкупна моќност од околу 24 мегавати да произведува струја во Валандово. Во сопственост е на Тотал Инженеринг на Вице Заев, братот на поранешниот премиер Зоран Заев, како и на Бобан Заев Холдинг на братучедот Бобан Заев. Финансиската изложеност на „Соар Енерџи Груп“ во моментов е 6,5 милиони евра, а обврските лани достигнале до 8,5 милиони евра.

Ековат – Груп инвестирала во три фотоцентрали во Сушица, Ново Село,  со вкупна инсталирана моќност од 10 мегавати. Лани направила расходи од половина милион евра. Годишната финансиска изложеност е поголема од 600.000 евра, а билансот за лани покажува дека обврските достигнале 14 милиони евра. Сопствеништвото е поврзано со Симеон и Горан Крстеви, познати како бизнис партнери на семејството Заеви. Индиректно во сопствеништвото фигурирале и две фирми кои имаат потекло од Бугарија – „Грал“ и „Зунче“.

Од Регулаторната комисија за енергетика добивме одговор дека двете фирми се одбиени во последниот филтер затоа што не може соодветно да се приклучат на мрежата и дека досега вакво одбивање со посебен акт имало само за непрофитни организации како Фудбалската федерација на Македонија и Фондот за пензиско осигурување.

„РКЕ ги одби барањата за привремени
лиценци на Соар Енерџи груп Доо Струмица и Ековат – Груп Доо Струмица за
производство на електрична енергија, поради тоа што не е реализиран условот
предвиден во Решението за согласност за приклучување на електродистрибутивна
мрежа. Во Решението се предвидува дека е потребно да се изврши најпрвин надоградба
на соодветните трафостаници, со цел да се овозможи приклучок на новите
производствени капацитети“, ни рекоа од регулаторот.

Од таму додаваат дека одлуките се конечни и дека на двете фирми им преостанува единствено да се жалат по судски пат.

„Одлуките на РКЕ се конечни и по истите може
да се поведе спор пред Управниот суд. Во исто време Ве информираме дека овие
друштва имаа поднесено барање за привремени лиценци, кои новиот Закон за
енергетика не ги препознава. Доколку се променат условите и се изврши
надоградба на соодветните трафостаници, друштвата може да поднесат нови барања,
согласно новиот Закон за енергетика за пробна или трајна лиценца“, ни одговорија од комисијата.

Познавачите велат дека привремена лиценца рутински им се доделува на компаниите непосредно пред да започнат со производство, пред да ја добијат трајната лиценца која следува за околу половина година потоа. Испративме и прашања до ЕВН Електродистрибуција за тоа какви се условите за приклучување на овие проекти, но досега оттаму не добивме одговор.

А.К.