Дурмиши: Зеленчукот и овошјето е скапо иако е сезона, инспекторите треба да ги контролираат и „зелените“ пазари
Министерот за економија Бесир Дурмиши на денешниот брифинг со новинарите рече дека се согласува со констатацијата дека зелечнукот и овошјето е скапо, иако е веќе мај, но дека ќе бидат потребни законски измени за да можат инспекторите да ги контролираат „зелените пазари“.
– Секојдневно сме во комуникација со Државниот пазарен инспекторат. Точно е дека кај зелените пазари има малверзации, ние сме на терен и сме во тек. Ќе направиме ако треба и измена на одредени законски членови, ако можеме,за да може инспекторатот да врши контрола и на зелените пазари и нормално, да пишува казни ако фати вакви трговци кои работат без потребните податоци како другите трговци, рече Дурмиши.
Министерот објави дека инфлацијата во април 2025 во споредба со април лани е 2,6 проценти и дека е тоа во рамки на нормалната граница до 3 отсто. Кај цените на храна имало годишно зголемување од само 0,3 проценти,а во периодот декември 2024 – април 2025 имало дефлација.
Дурмиши наведе дека ако извептајот на ДПИ утврди повторно енормно зголемување на цените од страна на производителите и трговците, дека тоа ќе се смета за неоправдано и дека повторно ќе следуваат мерки.
– Може да ја прошириме листата на производи и да се стават повеќе производи на истата, може да се зголеми процентот на маржа, ги повикувам трговците и производителите да не се однесуваат девијантно и да не ги покачуваат цените неоправдано, кажа Дурмиши.
Според министерот, „енормно“ зголемување на цените би било, според него, 10-15-20 проценти и тогаш државата би реагирала со контролни мерки.
