ДУИ е за избори во редовен термин, небитно дали заедно или одвоено, вели Османи
Изборите ќе бидат во редовен термин, а дали ќе бидат заедно или одвоени за тоа ќе треба да се договорат политичките партии, вели министерот за надворешни работи Бујар Османи кој е потпретседател на ДУИ.
-Ставот на ДУИ е дека изборите треба да се одржат во редовниот термин. Дали ќе бидат заедно, или не тоа треба дополнително во консултации со политичките партии да се договориме. Нас ни одговара која било варијанта, рече Османи на новинарско прашање на денешниот брифинг во МНР.
Опозициската ВМРО-ДПМНЕ бара лидерска средба за договор за датумот на изборите и го повика претседателот на Собранието да ја свика. Тие се загалаат запредвремени парламентарни избори и сметаат дека тие треба да се одржат заедно со претседателските избори.
Премиерот Димитар Ковачевски порача дека изборите ќе бидат во својот редовен термин, и оти тоа е апсолвирано прашање. За предвремени парламентарни избори, вели, тие би можеле да се закажат истиот ден штом Собранието ги изгласа уставните измени, одлука која е клучна за продолжување на евроинтеграциите.
