ДСЗИ: Нема констатирани пропусти за случајот со починатото дете од Кавадарци
Државниот санитарен и здравствен инспекторат (ДСЗИ) не утврдил неправилности кои се во негова надлежност при надзорите во врска со смртта на тригодишното дете од Кавадарци. Како што информираат од Инспекторатот за МИА, инспекцискиот надзор е спроведен по добиената информација за трагичниот случај.
– Имајќи предвид дека ДСЗИ нема надлежност врз стручниот дел од работата на здравствените работници, согласно член 296 од Законот за здравствена заштита, ќе поднесеме иницијатива до министерот за здравство за формирање комисија за стручен надзор – велат од Инспекторатот.
Вонредни надзори биле спроведени на 5 јуни во три здравствени установи: ПЗУ Ординација по општа медицина „Целзус Нова“ – Кавадарци, ЈЗУ Општа болница со проширена дејност – Кавадарци и ЈЗУ Универзитетска клиника за детски болести – Скопје. Целта била да се следи текот на лекувањето на детето.
Од увидот во медицинската документација и изјавите на здравствените работници кои биле вклучени во случајот, утврдени се следните факти: станува збор за дете родено во јануари 2021 година, со повеќе коморбидитети, кое и претходно било лекувано во болницата во Кавадарци и на Клиниката за детски болести во Скопје.
На 3 јуни, во пет часот изутрина, родителите го донеле детето во кавадаречката болница, каде дежурен педијатар проценил дека нема индикации за хоспитализација. Сепак, на инсистирање на родителите, бил издаден упат за Скопје. Детето било транспортирано со сопствен превоз.
– Според изјавите на здравствените работници на Клиниката, детето пристигнало околу осум часот наутро директно на Одделот за кардиологија, без знаци на живот. Било префрлено на Одделот за интензивна нега и реанимација, каде било констатирано дека не покажува знаци на живот – наведуваат од ДСЗИ.
Дополнително, директорот на болницата во Кавадарци формирал трочлена комисија од доктори за утврдување на евентуална материјална одговорност кај медицинскиот персонал. Извештајот од комисијата е во изработка.
