ДРЖАВНИОТ ТУТУНСКИ КОМБИНАТ ГО „ТРЕСАТ“ ПРОМЕНИ ВО МЕНАЏЕРСКИОТ ТИМ – отповикан членот на Одборот на директори Ристе Ташев, еве кој го наследува
Се случија промени во менаџерскиот врв на државното акционерско друштво Тутунски комбинат Прилеп.
За директорските смени е известена целата инвеститорска јавност преку Македонската берза за хартии од вредност.
Имено, отповикан е членот на Одборот на директори на компанијата Ристе Ташев, а на негово место се избира Горан Тодоров. И двајцата се од Кавадарци.
„Ристе Ташев од Неготино се отповикува од должноста извршен член на Одборот на директори на Тутунски комбинат АД Прилеп. Се овластува регистрационен агент да поднесе пријава за бришење на упис во трговскиот регистар на РСМ на извршниот член Ристе Ташев. Одлуката стапува во сила на денот на нејзиното донесување“, се вели во објкавената одлука од компанијата која е донесена во текот на вчерашниот ден.
Од компанијата образложуваат дека согласно Законот за трговски друштва, Собранието на акционери може да ги отповика сите членови на Одборот на директори или на Надзорниот одбор, или пак членопви на овие органи и пред истекот на времето за коешто биле избрани.
За одлуката за отповикување е потребно мнозинство гласови од акциите со право на глас претставени на Собранието.
Додека, пак, за нов член на Одборот на директори, Собранието одлучило да го избере Горан Тодоров, магистѕер по менаџмент на човечки ресурси, со адреса на живбеење Конопиште Кавадарци.
Мандатот на членот на Одборот на директори ќе трае четири години.
И оваа одлука е веќе стапена на сила од денот на нејзиното донесување, а за неа гласале мнозинството од акционерите со право на глас.
Инаку, Тутунски комбинат Прилеп е акционерско друштво во сопственост на Владата, односно Владата таму е доминантен сопственик, со 82,66 отсто од акциите.
Н.Н.Ф.
