Државната лотарија од новата „монополска“ онлајн платформа за обложување годинава ќе собере 36 милиони евра
Државна лотарија, акционерското друштво во државна сопственост,годинава планира од новото државното казино и обложувалница за организирање на онлајн игри на среќа „Мегавин“ да собере 36 милиони евра од граѓаните.
Во финансискиот план за 2025 на АД „Државна лотарија“, објавен овие денови, пишува дека оваа сума ќе се собере од организирањето на електронските и интернет игрите на среќа. Инаку „Мегавин“ е единствена платформа во моментов на која може да се обложува онлајн, откако претходно Министерството за дигитализација го забрани играњето на сите други поради одземени лиценци.
Платформата „Мегавин“ започна со работа во последните денови од 2023, а за минатата година нема податоци колку пари и има донесено на „Државна лотарија“, бидејќи се уште не е изработен извештајот за 2024. Во меѓувреме лани Владата го забрани играњето на електронските игри на среќа на платформите на „Ново ВЛТ“ и друштвата за приредување интернет игри на среќа „Моцарт“, „77 Битс“ и „Везус“, кои Државна лотарија ги организираше со странски партнери, а истовремено беа преземени активности за отстранување и на платформата 2Win.mk
Во финансискиот план на Државна лотарија пишува дека се очекува да се доделат бонуси од 9 милиони евра за играчите на „Мегавин“, а истовремено предвидено е и да се плати изнајмување на софтвер од 9,7 милиони евра за платформата.
Арбер Адеми, потпретседател на ДУИ, лани изјави дека Владата решила намерно да го држи ова казино отворено, создавајќи монопол за оваа државна компанија. Од друга страна, премиерот Христијан Мицкоски најави дека лиценците на останатите друштва се доделени незаконски и нагласи дека органите на прогонот ќе го испитаат начинот и причините како се доделувале. Во меѓувреме единствено само „Мегавин“ остана отворена и единствена опција за овој тип на обложување. Од Владата иако најавија дека и таа ќе се затвори, сепак потоа соопштија дека „процедурата е сложена“.
„Се работи за еден покомплексен процес за кој е потребна детална анализа, решенијата што ги носи оваа Влада се предмет на аргументирани ставови. Исто така, во моментов се работи на нов Закон за игрите на среќа, кој има за цел да ги надмине сите претходно констатирани недостатоци“, рекоа од Владата.
Во меѓувреме, министерот за дигитална трансформација, Стефан Андоновски, рече дека со Законот за електронски комуникации се предлага да се забранат нелегалните онлајн игри на среќа или онлајн казината. Тој рече дека во Македонија не постои приватна институција лиценцирана за организирање на онлајн игри на среќа, а граѓаните знаат дека такви ги има многу. Откриени биле околу 160 провајдери кои се присутни на македонскиот пазар, но без дозвола за организирање на онлајн игри на среќа. По владината одлука за забрана на онлајн игрите на среќа, министерот Андоновски на почетокот на октомври рече дека следниот чекор ќе биде откривањето и затворањето на сите веб страници на кои се играат онлајн игри на среќа, а во оваа акција покрај домашните, ќе бидат вклучени и странските играчи на пазарот.
„Државна лотарија“ во структурата на приходи очекува за 2025 и дивиденда од 10,5 милиони евра од добивката од партнерството во „Државна видеолотарија“,која главно работи со ВЛТ-апарати. Компанијата очекува за оваа година да има вкупна добивка пред оданочување од 21,5 милиони евра.
А.К.
