Драстичен пад на производството на струја во август, намален увозот на јаглен и гас

Вкупното бруто-производство на електрична енергија во август 2025 година забележало остар пад од 21,2% во споредба со истиот месец минатата година, покажуваат најновите податоци на Државниот завод за статистика. Споредено со јули 2025, производството е намалено за 16,8%.

Најголемо влијание врз падот на производството има намалената работа на комбинираните централи и индустриските енергани, кои во август 2025 произвеле 45,4% помалку струја во споредба со август 2024 година. Производството кај хидроцентралите е намалено за 28,1%, а кај термоцентралите за 8,3%.

Единствено зголемување на годишно ниво има кај производството од ветерни електрични централи (раст од 66,4%) и соларни централи (раст од 26,2%).

Пад и кај увозот на енергенси

Податоците за август покажуваат и значително намалување на увозот на клучни енергенси. Увозот на природен гас е намален за 40,1% во споредба со август 2024 година.

Намалување е забележано и кај вкупната потрошувачка на јаглен за 16,4%, пред сè поради намалената потрошувачка на лигнит и кафеав јаглен. Вкупната потрошувачка на нафтени продукти исто така бележи пад од 7,5% на годишно ниво.