Драма во Кавадарци: ТФТ го врати брејкот, ќе се игра „мајсторка“ во Скопје!
Скопјани одлично го затворија мечот, ги постигнаа последните седум поени на средбата со кои направија резултатски пресврт и дојдоа до драгоцениот триумф. Кавадарчани, пак, пропуштија голема шанса за пласман меѓу четирите најдобри екипи, а згора на тоа на три секунди до крајот имаа и можност да изборат барем продолжение, но при негатива од 72-74 Марјан Младеновиќ ги промаши двете слободни фрлања.
Домаќинот подобро го отвори натпреварот, уште во првата четвртина дојде до плус (20-12), но гостите од Скопје брзо ја вратија резултатската неизвесност и веќе во вториот период самите дојдоа до највисоките вечерва плус седум (40-33). Оттогаш се играше рамноправно, со голем број промени во водството, за на крајот кошаркарите од скопската населба Тафталиџе да дојдат до посакуваниот успех.
Американецот Дупри Мекбраер со 20 поени, шест скока и пет асистенции беше најдобар кај ТФТ, додека Александар Костоски дополни со 12 поени, пет скока и седум асистенции. Јуре Планиниќ со 19 поени беше најефикасен кај Еуро Никел, додека трагичарот на вечерта Младеновиќ средбата ја заврши со 12 поени, пет скока и 12 асистенции.
Решавачкиот трет меч ќе се игра следниот викенд во Скопје. Вечерва се играат вторите средби и од сериите помеѓу Кожув и МЗТ (0-1) односно Феникс и Пелистер (0-1).
