ДОЖИВОТЕН ЗАТВОР ЗА БРАТОУБИСТВОТО ВО КАВАДАРЦИ: Го убил Илија со тесла на роденден, го закопал во шупа, па му ги трошел парите
Правдата е задоволена за едно од најмонструозните убиства во поновата историја на Кавадарци. Основниот суд во Кавадарци му изрече казна доживотен затвор на 43-годишниот С.И., кој призна дека ладнокрвно и од користољубие го убил својот помлад брат Илија Иванов.
Злосторството е извршено на особено суров начин, токму на роденденот на жртвата, а мотивот бил бизарна расправија за имот.
Трагедијата се случила на 27 јули годинава. Двајцата браќа започнале кавга на роденденот на Илија, бидејќи убиецот бил убеден дека помладиот брат сака да му го земе целиот имот.
Поттикнат од гнев и омраза, С.И. грабнал тесла и со тапиот метален дел го удрил брат му по главата. Кога Илија паднал, тој продолжил да го удира уште двапати, нанесувајќи му смртоносни повреди на лице место.
Она што следело по убиството сведочи за ладнокрвноста на сторителот:
Додека семејството и полицијата трагале по исчезнатиот Илија (телото беше пронајдено на 5 август), убиецот профитирал од смртта на брат му.
Во периодот од 30 јули до 5 август, тој ја користел банкарската картичка на мртвиот брат и во повеќе наврати повлекувал пари од банкомати.
Обвинетиот во целост го признал делото онака како што било опишано во обвинителниот акт. Со оглед на тежината на делото – Убиство од користољубие – судот немаше милост и му изрече најстрога можна казна.
Тој останува во притвор сè додека не биде спроведен на издржување на доживотната робија.
