Доналд Туск и официјално е премиер на Полска
Владата на новиот полски премиер Доналд Туск во средата положи заклетва, што е последен чекор во трансферот на власта во земјата во која веќе осум години владеат националисти, честопати во судир со Европската унија.
По долгогодишен конфликт меѓу Варшава и Брисел под претходната полска влада предводена од конзервативната партија Право и правда (ПиС), назначувањето на поранешниот шеф на Европскиот совет создава атмосфера за подобри односи меѓу Варшава и остатокот од Европа.
Во говорот пред парламентот во вторникот, Туск, кој беше и премиер од 2007 до 2014 година, вети дека ќе обезбеди милијарди евра од европскиот буџет, претходно замрзнат поради загриженоста на Брисел за владеењето на правото во земјата.
Таа задача би можела да биде отежната од судиите назначени од ПиС како дел од неговите контроверзни реформи, кои критичарите ги нарекоа поразителни за независноста на судството. Тука е и претседателот Анджеј Дуда, сојузник на ПиС, кој има право на вето на законодавството.
Мора да бидете оптимисти“, рече Туск пред полагањето заклетва во претседателската палата.
„Се надевам дека имаме заеднички цели, дури и ако имаме различни патишта и искуства. Никој не се сомнева дека мораме да и служиме на Полска“.
Уставниот суд на Полска во понеделникот пресуди дека изборната реформа што Полска мора да ја донесе за да дозволи пристап до европските фондови е неуставна. Истиот заклучок беше донесен од судот и за казните што ги изрече највисокиот суд на ЕУ пред конечната одлука, познати како привремени мерки.
Туск треба да учествува на самитот на ЕУ во четврток и петок. Покрај обидот да ги деблокира средствата за Полска, Туск ќе работи и на поддршка за членството на Украина во Европската унија.
Во време кога Киев е сè позагрижен за посветеноста на западните сојузници да ја финансираат неговата одбрана од руската инвазија, Туск најавува дека Полска ќе се залага за продолжување на помошта.
На средбата во Брисел, Унгарија, чиј премиер Виктор Орбан беше најблизок до претходните полски власти, може да стави вето на почетокот на преговорите на Украина со ЕУ.
