Доларот ослабе по пет недели раст
Вредноста на доларот во однос на кошницата валути минатата недела падна за прв пат по пет недели раст, бидејќи стана сè појасно дека американската ФЕД нема да брза да ги намали каматните стапки, а исто така и Европската централна банка ( ЕЦБ).
Во такви услови, индексот на доларот, кој ја следи вредноста на американскиот долар во однос на шесте најважни светски валути, падна за прв пат од почетокот на 2024 година, за 0,33 отсто, на 103,90 поени.
Истовремено, вредноста на доларот во однос на европската валута падна за 0,4 отсто, така што еврото на крајот на неделата изнесуваше 1,0818 долари.
Курсот на еврото оствари најголема неделна добивка во последните два месеци, на крилата на очекувањата за бавно намалување на каматните стапки во еврозоната во текот на оваа година. Имено, сега учесниците на пазарот проценуваат дека Европската централна банка би можела да ги намали каматните стапки во еврозоната за 90 базични поени, додека на крајот на 2023 година очекуваа да ги намали за 160 базични поени.
И зголемениот апетит за ризик, кој ги доведе глобалните берзи на рекордно високо ниво минатата недела, исто така ја намали побарувачката за американската валута, која се смета за безбедно засолниште за капиталот. За нови насоки во однос на американската и европската монетарна политика, инвеститорите чекаат нови економски показатели.
„Сè уште не е време да се продаде доларот, но мислиме дека тој ќе почне да слабее во вториот квартал, под претпоставка дека ФЕД ќе ги намали стапките во април и ќе продолжи да ги намалува стапките на квартално ниво“, рече Атанасиос Вамвакидис, стратег во BofA Global Research.
BofA очекува еврото да зајакне на 1,15 во однос на доларот до крајот на годината. „Ако американската економија остане толку силна, мораме да го смениме нашиот став, бидејќи ФЕД можеби нема да може да ги намали каматните стапки во април или дури оваа година“, додаде тој.
