ДКСК се пожали: Имаме 56 иницијативи за покренување постапка за крвично гонење, но ниту една не е процесуирана!
Државната комисија за спречување на корупцијата (ДКСК) за време на својот петгодишен мандат оформила вкупно 2872 предмети.
Од нив 2788 биле по пријави од областа на спречување на корупцијата, а 84 предмети се оформени по сопствена иницијатива.
Решени биле 2451 предмети, а имало и поднесени 59 иницијативи за утврдување одговорност на раководни и службени лица и 56 иницијативи за покренување постапка за крвично гонење, но ниту една иницијатива за кривично гонење не била процесуирана.
Ова го изјави претседателката на ДКСК Билјана Ивановска на брифинг со новинарите по повод завршување на мандатот.
„Од нашите иницијативи за кривично гонење доставени до јавните обвинителства досега нема ниту една јавно обвинителска одлука што стасала до суд, не само од овој состав туку од постоењето на оваа институција од 2002 година навака со исклучок на „Бачило“. Тоа се вкупно над 200 иницијативи за кривично гонење кои излегле од овде во последните дваесетина години како постои оваа институција“, вели Ивановска.
За тоа што треба да се преземе понатаму за ова да се промени, таа вели дека прашањето треба да се постави во правосудните органи, каде се потребни коренити промени.
Според неа, секоја институција треба да си ја врши работата за која е надлежна.
