ДКСК: Нашата мисија за превенција и борба против корупцијата на сите нивоа останува непроменета и посилна
Денеска повторно преку соопштение се огласија од Државна комисија за спречување на корупцијата (ДКСК).
Тие велат дека следејќи ги последните случувања каде нивната претседателка Татјана Димитриевска беше приведена и моментално е под мерки за претпазливост поради давање информации на осомничено лице во случајот Адитив, тие порачуваат дека институцијата останува целосно доследна на почитувањето на принципите на интегритет, транспарентност и владеење на правото.
„Државната комисија како институција продолжува да работи независно и ефикасно, во согласност со своите законски надлежности и својот мандат Државната комисија продолжува да ги спроведува своите тековни активности и обврски, а нејзината мисија за превенција и борба против корупцијата на сите нивоа останува непроменета и посилна од било кога.
Државната комисија уверува дека постапките за утврдување индивидуална одговорност не ја поткопуваат институционалната и колективната посветеност. Свесни сме за важноста и значењето на довербата од јавноста. Затоа ќе продолжиме да работиме со највисока транспарентност и да соработуваме со надлежните институции, обезбедувајќи почитување на законите и највисоките етички стандарди во рамките на ДКСК“, велат од ДКСК.
