Димитриевски: Секој треба да помине предвојничка обука, народот треба да биде подготвен да се самозаштити!
Кандидатот за претседател Максим Димитриевски во подкаст на Сител телевизија одговори и на прашањето дали доколку е во можност, би го вратил воениот рок.
Според него, сите треба да поминат превојничка обука и младите да научат што е дисциплина, и да видат како за еден минимален период од три месеци ќе се трансформираат себе си, а и својот личен карактер во нешто многу подобро.
„Не случајно во минатото старите луѓе рекле – тој што не бил во војска не е маж. Зборувам за мажите. Дури на доброволна основа барем до еден месец тоа би требало да можат да го сторат и жените, бидејќи ние сме еднакви. Да се научат одредени вештини за преживување, дополнително за ракување со огнено оружје. Ние живееме на едно трусно подрачје, коешто се вика Балкан и мислам дека народот треба да биде подготвен во секој момент прво да се самозаштити, а дополнително и да си ја заштити државата и да ја одбрани од сите предизвици и закани коишто следуваат. Многу пати велиме ние сме под чадорот на НАТО, имаме колективна безбедност. Но, многу често заканата не доаѓа само од надвор, туку многу почесто од внатре“, порача Димитриевски.
