Димитриеска-Кочоска: Комерцијалните банки нема да земаат провизија за администрирање на унгарскиот заем
Министерката за финансии Гордана Димитриеска-Кочоска е убедена дека домашните комерцијални банки нема да земат провизија од администрирањето на делот од унгарскиот заем од 250 милиони евра кој ќе им се дели како поволни кредити на македонските компании.
Министерката во „Тема на денот“ на ТВ Сител рече дека усно е договорено со комерцијалните банки да не побараат некаков процент за да ја овозможат услугата околу доделување на кредитите на фирмите, или пак таа услуга да биде незначително наплатена.
-Првичните разговори ни беа сепак и тие да учествуваат во целата оваа работа за да ја заживееме економијата, бидејќи знаеме дека во изминатите години го достигнавме нивото, очекувањата на приватниот сектор беа многу лоши затоа и инфлацијата се влошуваше и сега тука заеднички ќе се потрудиме да најдеме начин како и комерцијалните банки да ја поддржат целата оваа работа со минимални или речиси никакви заработки. Секако ќе разговараме, Развојната банка ќе разговара со нив и ќе видиме понатаму како ќе оди целата постапка, вели министерката за фианнсии.
Прашана дали фирмите ќе имаат некакви дополнителни обврски кон комерцијалните банки, бидејќи првично беше најавено дека условите коишто ги користи државата од Унгарија ќе ги имаат и компаниите во земјава, министерката за финансии одговори потврдно.
-Истите услови. Тука нема дилема. Значи, остануваат истите услови – каматната стапка, исто 15 години рок на отплата со вклучени три години грејс период, но она што е важно што и компаниите го знаат и претходно сме го зборувале, станува збор за компании коишто се производни, коишто ќе инвестираат во машини и опрема. Зошто е тоа така, ние рековме нема да ставиме само акцент на извозните компании, може да се и домашните компании коишто произведуваат и продаваат на домашниот пазар. Целта е или да го поттикнеме извозот или да го намалиме увозот. Ефектот е потполно ист. Затоа велиме производни компании под истите услови под коишто и ние го обезбедуваме кредитот, подвлекува Димитриеска-Кочоска.
Таа наведе дека кредитот преку комерцијалните банки ќе биде ставен на располагање за компаниите под истите услови како и за државата, а прво 250-те милиони евра ќе бидат префрлени на сметка кај државната Развојна банка,која сепак нема широк капацитет за администрирање и таа улога ќе мора да им ја допушти на домашните кредитори.
– Тие (компаниите) ќе треба да аплицираат кај Развојната банка, Развојната банка понатаму ќе стапи во комуникација со нив. Најважно од се е тоа што приватниот сектор треба да знае дека средствата ги обезбедивме, дека штом ќе легнат на сметка ќе ги пренасочиме кон Развојната банка и понатаму таа ќе се договори со комерцијалните банки како ќе бидат распределени средствата по комерцијалните банки, вели Димитриеска-Кочоска.
