ДИК ги потврди новите градоначалници на Гостивар, Врапчиште, Маврово Ростуше и Центар Жупа
Државната изборна комисија (ДИК) денеска на седница ги потврди новите градоначалници за неколку општини, по изборите одржани на 11 јануари. За општините Гостивар, Врапчиште, Маврово Ростуше и Центар Жупа, ДИК ги потврди имињата на Ваљбон Лимани и Исен Шабани од Национална алијанса за интеграција, Онер Јакуповски од коалицијата „Твоја Македонија“ и Аријан Ибраим од Демократската партија на Турците.
Потпретседателот на ДИК, Абдуш Демири, нагласи дека Комисијата ги задолжува општинските изборни комисии да постапат во согласност со Изборниот законик и веднаш да ги објават конечните резултати од гласањето.
Ангелчо Ристов од ДИК се осврна на случајот со гласачкото место 0782 во Гостивар, каде гласањето не било спроведено.
„Пред да пристапи Комисијата кон објава на конечни резултати, ДИК мора да донесе одлука за не спроведување на гласање на избирачкото место 0782 за општина Гостивар, на кое на 11 јануари, во согласност со членот 104 и став 2 од Изборниот законик, поради лошите временски услови, не беше спроведено гласање“, појасни Ристов на почетокот на седницата.
Тој додаде дека на ова избирачко место биле запишани само 23 лица со право на глас и дека овој број нема влијание врз конечните резултати за кандидатите за градоначалник на општината.
