Денот Д за Зимзоленд – треба да се произнесат за забелешките при инспекцискиот надзор
Денеска истекува рокот во кој организаторите на манифестацијата „Зимзоленд“ треба да се произнесат по забелешките утврдени при инспекцискиот надзор, соопштуваат од Општина Аеродром.
Од локалната самоуправа најавуваат дека веднаш по истекот на рокот ќе постапат согласно законските надлежности, при што ќе биде земено предвид и изјаснувањето на организаторите во однос на констатираните неправилности.
Градоначалникот на Општина Аеродром, Дејан Митески, информира дека општинските инспекциски служби извршиле теренска контрола, по што е составен записник со конкретни наоди и забелешки, кој е официјално доставен до организаторите на настанот.
Како што посочуваат од Општината, конечната одлука за понатамошните чекори ќе биде донесена врз основа на резултатите од извршениот надзор и доставеното изјаснување, по што јавноста ќе биде навремено информирана за исходот.
Според информациите, паркот поставен на приватна сопственост во Аеродром беше предмет на инспекциски надзор, при што е констатирано дека субјектот нема добиено одобрение за поставување на луна паркот од надлежен орган на Градот, но и покрај тоа продолжува непречено да работи.
Исто така, и Основното јавно обвинителство (ОЈО) Скопје оформило предмет за функционирањето на новогодишниот лунапарк „Зимзоленд“ во Општина Аеродром за да се испита дали постојат елементи на кривично дело предизвикување општа опасност.
