Данела Арсовска во ОЈО за дивоградбите во Чаир: Постепете пред да ви ги уништат доказите!
Градоначалничката на Град Скопје, Данела Арсовска, денеска поднесе документација во Основното јавно обвинителство Скопје, поврзана со, како што вели, организирано дивеење со урбанистички криминал во општина Чаир.
Според Арсовска, во документацијата што ја поседува Град Скопје од Катастарот за недвижнини, се гледа дека биле упишани имотни листови спротивно на закон и без согласност од Градот.
„Откако видовме дека е извршен упис спротивно на законот и без наше знаење и согласност, веднаш реагиравме и ја известивме јавноста. За истиот проблем веќе трета година доставуваме информации до Општина Чаир, која и покрај тоа не презема ништо. Наместо да постапи со рушење, тие се обидуваат да ги легализираат дивоградбите за кои знаат дека се спротивни на законот“, истакна Арсовска.
Според неа, се работи и за обид за фалсификување документи – објасни дека во Катастарот биле поднесени лажни податоци, во кои се наведува дека Град Скопје наводно издал потврда за платен надоместок за градба, што не е точно.
Арсовска посочи дека на 27 мај, откако градските служби алармирале за конкретна дивоградба во Чаир, само еден час по нивното излегување на терен, градоначалникот Висар Ганиу донел и поднел решение за поништување на сопственото решение за запишување на објектот во Катастарот.
„Тој го поништил решението и се обидел да го избрише случајот од Катастарот – тоа е директен доказ дека имаме криминал. За помалку од 24 часа Катастарот утврдил дека документите се неверодостојни“, додаде таа.
