ЦУК: Нема нови излевања во Тетово, 250 лица сместени во Кичево
Состојбата со поплавите во земјава до 08:30 часот останува под контрола, без нови пријави за излевање во дел од погодените региони, информира Центар за управување со кризи.
Тетовски регион
Во Тетовскиот регион нема нови пријави за излевање на реката Вардар кај село Форино, ниту на другите водотеци каде вчера беше евидентирано излевање и поплавување.
На патниот правец Тетово–Попова Шапка во сила е забрана за движење на автобуси, додека за останатите патнички моторни возила е задолжителна употреба на зимска опрема.
Битолски регион
Во Битолскиот регион, преку Единствениот број за итни повици 112 е примена пријава од жител на улицата „Буквски Мост“ за поплавена куќа. Случајот е проследен до ТППЕ Битола за понатамошно постапување.
Нивото на реката Црна Река во село Новаци изнесува 310 сантиметри.
Во ЕЛС Долнени утрово е воспоставен контакт, при што се очекува интервенција на патниот правец од село Сливје кон село Костинци, кој е во лоша состојба. Активностите ќе се реализираат со механизација од ЈП Македонија пат.
Кичевски регион
На подрачјето на Кичево нема нови поплавувања на објекти, а состојбата останува непроменета. Според информациите, нивото на реките и водотеците е во континуирано намалување.
Вкупно 250 евакуирани лица се сместени во спортската сала „Христо Узунов“, каде им се обезбедени храна, вода и хигиенски производи.
Екипи на ЈП „Комуналец“ и ТППЕ вршат испумпување вода од подрумите на улиците Прилепска, Пиринска, Први Мај и 29 Ноември.
