Црн рекорд на мапата на ЕЕА: Македонија е најзагадена земја во Европа – дишеме „отров“ неколку пати над дозволеното

Македонија се искачи на самиот врв на неславната листа како најзагадена земја во Европа. Според најновите податоци од мапата на Европската агенција за животна средина (ЕЕА), која го следи индексот на квалитетот на воздухот, нашата земја е рангирана во најлошата категорија.

Податоците се алармантни: концентрациите на опасните ПМ2.5 и ПМ10 честички се екстремно високи. Измерените вредности на ПМ2.5 честичките се неколку пати повисоки од максимално дозволената граница од 25 микрограми на метар кубен.

Ова претставува сериозен ризик по здравјето на населението, бидејќи овие честички се сметаат за најопасни загадувачи – тие лесно продираат длабоко во белите дробови, па дури и во крвотокот на луѓето.

Иако според Индексот за еколошки перформанси (Environmental Performance Index) минатата година Македонија беше рангирана на 59-то место од 180 земји, реалноста со воздухот е сосема поинаква. Кога се гледа само рангирањето за загадувањето на воздухот, земјата паѓа на 128-то место. Ова укажува на сериозен јаз помеѓу формалните еколошки политики (на хартија) и реалната ситуација на терен.