CNN: Западните сојузници стануваат нервозни поради контраофанзивата на Украина
Напредокот на контраофанзивата на Киев се мери во метри, а не во километри. Сојузниците на Киев многу добро знаат дека Украина не може да ја победи Русија без нивна помош, наведува американската телевизија.
Минските полиња во јужна Украина се толку густи што воените единици кои се обидуваат да ја освојат областа можат да напредуваат само „дрво по дрво“, изјави за Си-Ен-Ен војник вклучен во контраофанзивата на Киев на југот.
„Во сите мои години служба, никогаш не сум видел толку многу мини“, вели украински борец со кодно име „Легија“.
Според него, акциите на неговите војници биле „прилично успешни и ефективни“.
Сепак, додека тој и другите украински војници минуваат низ минските полиња, наидувајќи се на силно зајакната одбрана и воздушни напади, голем дел од светот изгледа дека мисли дека Украинците се движат прилично бавно.
Западните сојузници на Украина стануваат нервозни поради фактот што напредокот на долгоочекуваната контраофанзива на Киев се мери во метри, а не во километри.
Сојузниците на Киев многу добро знаат дека Украина не може да ја победи Русија без нивна помош.
Но, побавното од очекуваното темпо на контраофанзивата значи дека нивната поддршка може да стане сè понеодржлива доколку конфликтот се одолговлекува.
Многу земји кои ги поддржуваат воените напори на Украина се борат со висока инфлација, зголемени каматни стапки и слаб раст.
Нивните лидери, од кои некои се соочени со избори во следната година и половина, треба да го оправдаат огромното количество ресурси што ги вложија во Украина кога нивните гласачи се борат да врзат крај со крај.
