„Чоколадниот“ лабрадор Роџер – четириножниот колега кој лекува со поглед и со опавче на Клиниката за психијатрија
ЈЗУ Универзитетска клиника за психијатрија во Скопје воведе иновативен пристап во лекувањето преку вклучување на животни во терапевтскиот процес.
Новиот член на тимот е Роџер, 2,5-годишен „чоколаден“ лабрадор, кој преку т.н. Animal Assisted Activities (активности поддржани од животни) им помага на пациентите во подобрување на нивната психосоцијална благосостојба.
Според директорката на клиниката, проф. д-р Славица Арсова, присуството на Роџер помага во создавање чувство на сигурност и доверба кај пациентите. Лабрадорот учествува во индивидуални и групни средби, секогаш под надзор на стручен тим.
Покрај терапевтската цел, клиниката со овој потег сака да ја подигне свеста за хумано вдомување на бездомните животни.
Роџер има соодветно сместување пред клиниката, под постојан ветеринарен надзор е и строго се почитуваат хигиенските протоколи во установата.
