Четворица од обвинетите за убиството на турски државјанин во Штип остануваат во притвор
Во Апелацискиот суд во Штип денеска беа спроведени обвинетите за убиството на турскиот државјанин Енес Оздемир, извршено на плоштадот „Слобода“ во мај годинава. Судот ја разгледа нивната жалба за укинување на мерката притвор, но според информациите од институцијата, притворот им е продолжен.
Следното рочиште пред Основниот суд Штип е закажано за 27 ноември во 9:30 часот, каде ќе им се суди на главниот обвинет – турски државјанин, и на лицата кои му помагале при извршување на делото и обидот за бегство. Основното јавно обвинителство поднесе обвинение на 4 октомври.
Според обвинителниот акт, петмина турски државјани се гонат за учество во убиството. Првообвинетиот, 21-годишник без регулиран престој, се товари за убиство и за неовластено држење оружје. Тој, според обвинението, во Скопје набавил полуавтоматски пиштол со избришени сериски податоци и се договорил да се сретне со жртвата на 8 мај во кафе-бар во центарот на Штип. По краток разговор, го извадил оружјето и пукал шест пати, при што Оздемир починал.
Тројца од обвинетите, иако знаеле за намерата да се изврши убиството, му обезбедиле сместување, логистика и помош при набавка на оружјето, а потоа и превоз до Штип.
Петтата обвинета, според обвинението, по убиството помогнала во обидот за бегство. Друштвото тргнало кон Скопје, но кај патарината „Миладиновци“ забележале полициска контрола. Таа го запрела возилото околу 300 метри пред патарината, овозможувајќи му на главниот извршител да избега покрај автопатот, каде подоцна бил уапсен. Останатите четворица биле запрени на патарината и приведени, иако се обиделе да побегнат.
Обвинителството бара продолжување на притворот за четворица обвинети, додека за петтата жена остануваат претходно определените мерки на претпазливост.
